2024-2025 жылғы жылыту маусымы басталғалы бері «Шығыс Жылу» АҚ филиалының мамандары ШҚО-дағы елді мекендерде жылуды тұтыну жүйелеріне тексеріс жүргізуде. Негізгі мақсат – жүйелердің нормативтік-техникалық талаптарға сәйкестігін қамтамасыз ету, деп хабарлайды Altainews.kz.  

Мысалы, Риддер қаласында көпқабатты үйлерде, жеке секторда, кеңселер мен басқа да ғимараттарда тұрақты жоспарлы және рейдтік тексерулер ұйымдастырылуда. Рейд барысында мамандар тұрғындардың шағымдарына жауап беріп, жылу тораптарындағы температуралық режим мен қысымды тексеріп, анықталған бұзушылықтарды тіркейді. Заң бұзушыларға үш күн ішінде кемшіліктерді жою туралы нұсқама беріледі.  

Егер нұсқама орындалмаса, келесі шаралар қолданылады:  
- жылу жүйесінен ажырату;  
- айыппұл өндіру үшін сотқа жүгіну.  

Рейдтерде ерекше назар заңсыз орталықтандырылған жылу жүйесіне қосылу және рұқсатсыз қосымша құрылғылар орнату фактілеріне аударылады. Мұндай әрекеттер ауыр зардаптарға әкелуі мүмкін деп есептеледі.  

Мысалы, 20 қарашада Риддер қаласының Мичурин көшесі, 1-үй мекенжайында рұқсатсыз қосылу фактісі анықталды. Мамандар металл құбырлар арқылы жылу тасымалдаушының сыртқа төгілгенін тіркеп, тұрғындарға хабарлама табыстады. Бұл іс бойынша материалдар сотқа жіберілді.  

«Шығыс Жылу» мамандары барлық тұрғындарды жылу энергиясын пайдалану ережелерін қатаң сақтауға шақырады. Ережелерді бұзу тек үй ішіндегі жүйеге зиян келтіріп қана қоймай, көрші тұрғындар мен жылу жеткізуші компанияға шығын әкелуі мүмкін.