Биыл Шығыс Қазақстан облысында АИТВ (ВИЧ) жұқтырған 305 жағдай тіркелді. Олардың 60%-ы ер адамдардан, 40%-ы әйелдерден анықталды, деп хабарлайды  Altainews.kz  тілшісі.

1 желтоқсан - Дүниежүзілік ЖИТС-ке қарсы күрес күні. Осыған орай, ШҚО ЖИТС-тің алдын алу және онымен күрес жөніндегі орталығы тұрғындар арасында ақпараттық кездесулер өткізіп, бұл емі жоқ қауіпті індеттің алдын алу бойынша насихат жұмыстарын кеңінен жүргізуде.

Орталық мамандарының айтуынша, бұрын бұл ауру нашақорлардың ортақ ине қолдануынан таралса, соңғы 3-4 жылда көбіне жыныстық жолмен жұғу жиілеп отыр. Сондықтан өңірдің әр 200-ші тұрғыны осы ауруды жұқтыру қаупіне ұшырауы мүмкін.

Егер жүкті әйелден АИТВ анықталса, болашақ ана уақытылы ем қабылдауы тиіс. Дұрыс және дер кезінде жүргізілген терапия сау баланың дүниеге келу ықтималдығын арттырады.

АИТВ ауруының нақты емі болмаса да, оңалту шаралары арқылы науқастар толыққанды өмір сүре алады.

Айта кетейік, Дүниежүзілік ЖИТС-ке қарсы күрес күніне орай, 29 қарашада Буров көшесі, 21/1 мекенжайында орналасқан ШҚО ЖИТС-тің алдын алу және онымен күрес жөніндегі орталығында сағат 8:00-ден 15:30-ға дейін тұрғындар АИТВ жұқпасына тегін тест тапсыра алады. Тест анонимді және ашық түрде жүргізіледі.

Ақерке Рағызбаева
Фото: Аяужан Утеулинова
Видео: Ермек Жиенбеков