Өскемендегі Халық Қаһарманы Қасым Қайсенов атындағы 27943 әскери бөлімінде күзгі шақырылыммен мерзімді қызметін өтеуге келген 400-ге жуық сарбаз әскери ант қабылдады. Биыл Қарулы Күштердің қатарына іліккен жауынгерлер еліміздің 12 өңірінен жиналған, деп хабарлайды Altainews.kz сайтының тілшісі. 

Салтанатты жиынға әскерилер мен ата-аналар, қала тұрғындарымен қоса, жергілікті БАҚ өкілдері қатысты.
Осы уақытқа дейін сарбаздар алғашқы әскери дайындық курсынан өтті. Яғни қару-жарақты ұстап үйреніп, әскери ұрыс тактикаларын меңгерді. Атап айтқанда, осымен алдағы оқу-жаттығу жұмыстарының негізгі дағдыларын игеріп болды. Сонымен қатар, Қарулы Күштердің жарғысымен танысты. Тәжірибелі офицерлер мен сержанттар оларға тәлімгер рөлін атқара отырып, жас жауынгерлерді әскери тәртіп пен командалық жұмысқа бейімдеген. 

Әскери ант қабылдап, Отан алдындағы борышын өтеуге келгендердің бірі – тараздық Дастан Талғатұлы. 

Ұлттық ұлан сапында әскери борышын өтеуді абыройлы іс деп білетін Шымкенттен келген Ақжол Түгел де бар. Ол ел тыныштығын күзету -  ерлердің ісі екені Ата Заңда да айқын көрсетілген дейді. Сондықтан әскери бөлімдегі темірдей тәртіп өзін шыңдап, шынықтыратын нағыз өмір мектебіне айналатынына сенімі мол.  

Айтулы шараға қатысқан ата-аналар қауымы ерекше сезімде болды. Ал жас сарбаздар бір ай ішінде меңгерген әскери ұрыс тәсілдерін, саптық жүрістерін паш етіп, жоғары деңгей көрсете білді. 

Ал шымкенттік  Ақылбек Беріков, бүгін дүйім жұрттың алдында әскери ант қабылдап, жауынгерлік қызметін абыроймен өткеруге серт берген ұлына қарап, көңілі марқайып қалғанын жасырмады. Өз баласына үлкен үміт артқан әке осылайша, жан тебіренісімен бөлісті. 

Бұл ретте, Өскемен гарнизонының 27943 әскери бөлім командирінің тәрбие және идеологиялық жұмыстар жөніндегі орынбасары Азамат Джумагазиев сарбаздардың ант қабылдау рәсіміне дейін, ата-аналарға екі күн бойы «Ашық есік күні» ұйымдастырылғанын айтады. Сонымен қоса, ол бүгінде мемлекет тарапынан әскери қызметтің сапасын арттыруға негізделген көптеген іс-шара жүзеге асырылып жатқанын және бұл бөлімнің жауынгерлік дайындық дәрежесі өте жоғары екенін алға тартты. Сәйкесінше, негізгі тәрбие жұмысы кез келген заң бұзушылықты болдырмай, олардың алдын алуға бағытталатынын мәлімдеді.

Арайлым Орсаринова