Аралас жекпе-жек спортынан самарлық спортшы Бақжанар Нұрланбекұлы жақсы жетістіктерге жетіп, аудан мақтанышына айналды, деп хабаралайды Altainews.kz тілшісі.

Ел арасында ережесіз жекпе-жекті кәсіби спорт мамандары «аралас жекпе-жек» деп атайды. Бұл жекпе-жек өнері жылдан-жылға жаңа леп алып, дамып келе жатыр. Жаужүрек жастардың арасында жекпе-жектің осы түрімен айналысушылардың саны күн санап артып келеді.  Шығыс Қазақстан облысы, Көкжыра ауылынан шыққан спортшы Бақжанар Нұрланбекұлы да осы жолды таңдады. Ол жуырда ғана Астанада өткен Free Fighting еркін жекпе-жек әлем чемпионатында жеңіске жетіп, спорт шеберне үміткер атанды.

Спортқа бала кезінен қызыққан балуанның алдынан бүгінде үлкен спортқа жол бастайтын есіктер айқара ашылды.

Бақжанар әлі студент. Ол қазір Сәрсен Аманжолов атындағы Шығыс Қазақстан университетінің 4-курсында оқиды Ол дене шынықтыру және спорт мамандығы бойынша білім алып, өзін кәсіби спорт жолында дамытуда.

Ережесіз жекпе-жекті көп адамдар қатыгездіктің, жауыздың бір түрі ретінде қабылдайды. Бірақ Бақжанар кез келген спорт дұрыс мақсатта қолданылмаса қауіпті деген пікірде. 

Кез келген спортшының басты мақсаты – жоғары нәтижелерге қол жеткізу. Бақжанардың алдында да әлі талай асулар тұр. Алдағы уаықтта ол ARB және Octagon лигаларында белбеуге таласуды жоспарлап отыр. 

Бақжанардың алдағы жарыстарда жоғары нәтижелерге қол жеткізіп, еліміздің атын шығарып, көк туымызды әлемдік додаларда желбіреткісі келеді. Табанды еңбегі мен қайсарлығы оны жеңістен жеңіске жетелей берсін деп тілейміз.

Ақерке Рағызбаева