Мемлекет басшысы Қасым-Жомарт Тоқаев 2025 жылды жұмысшы мамандықтары жылы деп жариялағаны белгілі. Осыған орай, елімізде жұмысшы мамандықтардың мәртебесін көтеруге бағытталған кешенді іс-шаралар қолға алынды. Жер-жерде үлкенді-кішілі кәсіпорындардың өкілдері университет, колледждердің студенттерімен кездесіп, оларды жұмысқа шақыруда, деп хабарлайды Altainews.kz тілшісі.

Сондай кездесулердің бірі бүгін Өскемендегі құрылыс колледжінде өтті. Кездесуге қатысқан «KAZ Minerals» және «ҮМЗ» компанияларының өкілдері жастарға аталмыш өндіріс орындарында еңбек етудің артықшылықтары туралы айтты. Басқосуға, сонымен қатар Amanat партиясы Шығыс Қазақстан облыстық филиалы төрағасының орынбасары Аманбай Нұркенов те қатысты.

Белгілі болғандай, кешенді жоспар аясында еңбек адамының құқығын қорғауға, оның өмірі мен денсаулығына қауіп төндіретін жағдаяттардың алдын алуға басымдық берілмек. Жұмысшы кадрлары үшін ипотекалық және жалға берілетін тұрғын үйдің жеңілдетілген бағдарламалары қарастырылыпты.
Аманбай Нұркеновтың айтуынша, мемлекет тарапынан колледждерде жұмысшы мамандықтарды оқытуды қаржыландыру екі есеге ұлғайтылды. Халықаралық талаптарға сай білім беру бағдарламалары енгізілді. Жұмыс берушілер тарапынан да тиісті шаралар қабылданып, жұмысшы кадрларды әлеуметтік қолдаудың корпоративтік тәжірибесін кеңінен тарату, ынталандыру шараларын енгізу жоспарлануда.

Кездесуге қатысқан студенттер келген қонақтарға қызықтырған сұрақтарын қойып, оларға толыққанды жауап алды. Осы ретте жастарды негізінен кәсіпорындарға жұмысқа орналасқан адамға қандай жеңілдіктер қарастырылғаны, еңбекақысының мөлшері мен баспана мәселесі толғандырады екен.
Өскемен құрылыс колледжі директорының оқу-өндірістік жұмыс бойынша орынбасары Бауыржан Жұмабаевтың айтуынша, бүгінде аталмыш оқу орнында 462 студент білім алуда. Колледжде дәнекерлеуші, автослесарь, автоэлектрик, жол-құрылыс техникасының машинисі, құрылысшы сияқты мамандықтар оқытылады.

Нұржан Кенжеұлы
Фото: Нелли Петенева
Видео: Ермек Жиенбеков