Бүгін ШҚО-дағы №20 орта мектебінде «Қазіргі білім беруде Ахмет Байтұрсынұлы мұрасының ғылыми-әдістемелік құндылығы» атты ғылыми-практикалық конференция өтті, деп хабарлайды Altainews.kz тілшісі. 

Аталған шара Ұлт ұстазы Ахмет Байтұрсынұлының есімі №20 орта мектебіне берілгеніне 25 жыл толуына арналған.

Халқымыздың көрнекті қоғам қайраткері, ірі ғалым, көсемсөз шебері, әдебиет зерттеушісі, түркітанушы, ақын-аудармашы А.Байтұрсынұлының өмірі мен шығармашылығын насихаттап, Алаш қайраткерінің қазақ халқы үшін сіңірген еңбегін дәріптеу мақсатында ұйымдастырылған шараға Астана қаласы, Абай облысы, С.Аманжолов атындағы ШҚУ-дің профессорлық-оқытушылық құрамы және қала мектептерінің қазақ тілі мен әдебиеті пәнінің мұғалімдері қатысты.     

Сонымен қатар Өскемен қалалық білім бөлімінің әдіскері Альмира Қабидолдина, С.Аманжолов атындағы Шығыс Қазақстан университетінің ректоры Мұхтар Төлеген құттықтау сөз сөйлеп, Қазақстан Жазушылар одағының мүшесі, PhD докторанты Заңғар Кәрімхан және алаштанушы, «Ахмет, Ұлт ұстазы», «Міржақып. Оян қазақ» фильмдерінің сценарий авторларының бірі Ұшқын Сәйдірахманұлы құнды баяндама жасады.

Осы жылдар аралығында мектепте Ахмет Байтұрсынұлының өмірі мен шығармашылығына арналған мұражай ашылған.

Жыл сайын дәстүрлі түрде қалалық «Ахмет оқулары», «Ахметтану білгірлері» зияткерлік сайыстары өтеді. Сондай-ақ, «Ахметтану» бағдарламасы негізінде оқу-ағарту жұмыстары жүргізіліп, еңбектері жас буынға насихатталады.    

Білім шаңырағының дарынды түлектері – «Алтын белгі» иегерлері, халықаралық және республикалық олимпиадалар мен байқаулардың жеңімпаздары, спорттық сайыстар мен өнер додаларында топ жарған талантты жастар мектептің абыройын асқақтатуда. 

Шара барысында конференция қатысушылары «Ұрпаққа үлгі ұлағат» атты көрмені тамашалады. ШҚО балалар мен жасөспірімдер кітапханасы ұйымдастырған көрмеге қазақ тіл білімінің атасы Ахмет Байтұрсыновтың 12 томдық шығармалар жинағы, «Әдебиет танытқыш», «Маса», «Қырық мысал» кітаптары қойылған.

Ұстаздар мектеп мұражайындағы жәдігерлермен танысқан соң, конференция жұмысы тақырыптық алаңдарда жалғасты.

Фото/видео: Жібек Нұрахмет