ШҚО-да полиция қар құрсауында қалған ветеринарды құтқарды
Фото: gorod.lv
Күршім ауданында ветеринар көрші ауылдан түскен шақыртуға барып, хабарсыз кеткен. Полицияға оның әріптесі хабарлағандай, ер адам сол кеткеннен төрт сағат бойы байланысқа шықпаған, деп хабарлайды Altainews.kz тілшісі.
Айта кетейік, өңірде бірнеше күн бойы ақ түтек боран соғып, соңғы тәулікте бір метрден астам қар жауған.
Жағдайға қанық болған учаскелік инспектор Руслан Керейбаев уақыт оздырмай жоғалған азаматты іздеуге шұғыл аттанады.
Белгілі болғандай, ветеринар жарты жолға жеткенде көлігімен қалың қарға батып қалған екен. Көмекке келген полиция қызметкері қар құрсауында қалған көлікті шығарып, жүргізушісімен бірге ауылға аман-есен жеткізген.
«Қазір ауа райына байланысты өңірдегі автожолдардың сегіз учаскесінде көлік қозғалысына шектеу қойылған, оның ішінде екі – республикалық, алты облыстық маңызы бар жол бар. Барлық жүргізушілер жолдағы шектеулерді ескеріп, боранды күні елді мекендерден тыс жерлерге шықпағаны жөн», – деп ескертеді ШҚО Полиция департаменті.
Айжанат Бақытқызы
Оқи отырыңыз
