Шығысқазақстандық спортшы  Азамат Дәулетбеков 2023 жылғы әлем чемпионатының бірінші медалін және 2024 жылғы Олимпиада ойындарының жолдамасын иеленді.

Жерлесіміз 2024 жылы Парижда өтетін Олимпиада ойындарында 86 келіге дейінгі салмақта өнер көрсететін болады, деп хабарлайды Altaynews тілшісі.

Азамат үшінші орын үшін өткен белдесуде бахрейндік балуан Магомед Шариповтан басым түсті. Бұл белдесу спортшы үшін өте тартысты өтті. Себебі ол қарсыласына 2:3 есебімен есе жіберіп тұрған. Десе де соңғы секундтарда қолданған әдісі нәтиже көрсетіп, жекпе жекті жеңіспен аяқтады.

Бұл салмақта америкалық Давид Тейлор алтыннан алқа тақса, күміс ирандық Хасан Язданиге бұйырды, осы салмақтағы екінші қоланы Токио Олимпиадасының қола жүлдегері, Сан-Марино спортшысы Майлз Амин қанжығасына байлады.

Айта кетейік, 2024 жылғы Олимпиада ойындарына тағы бір лицензияны қазақстандық балуан 92 келіге дейінгі салмақта Ризабек Айтмұхан жеңіп алды.

Естеріңізге сала кетейік, 16-24 қыркүйек аралығында Белградта 2023 жылғы әлем чемпионаты өтуде. Әлем чемпионы атағын және Олимпиада ойындарына қатысуға лицензияны грек-рим, еркін және әйелдер күресінен мыңнан астам спортшы өзара сарапқа салады.