Облыс орталығында «Жасыл ел» еңбек жасақтарының 18- маусымының жабылу салтанаты өтті.

Жазғы демалысында тер төгіп, тынымсыз еңбек еткен жастардың жұмысы еленіп, аудандар арасындағы үздік штаб анықталып, бағалы сыйлықтармен марапатталды.

2005 жылы елбасының жолдауынан бастау алған «Жасыл ел» еңбек жасағы бүгінде табысты еңбек етіп келеді. Еліміздің әр өңірінде жас буынды жұмысқа тартып, қала, аудан мен ауылдардың көркейуіне ат салуда.

«Жасыл ел» еңбек жасағының сарбаздары біздің өңірде де тер төгуде. Биыл осы жоба аясында облыс бойынша 16 мен 29 арасындағы 1200 жас жұмысқа тартылып, қала мен аудандардың абаттандыру, көгалдандыру жұмыстарын атқарды. Жыл аяқталуға жақындап, мәресіне жеткен маусым қаһармандарын марапаттау облыс орталығында өтті. 18-маусымда облыс бойынша 11 номинацияға лайық үздіктер анықталып, бағалы сыйлықтармен марапатталған.

Облыс бойынша үздік штаб номинациясын Жарма ауданы иеленді. Бұл аудан «Жасыл ел» еңбек жасақтарының 18- маусымында жалпы саны 90 жасты жұмыспен қамтыған. Оның ішінде көп балалы отбасыдан-28, аз қамтылған отбасылардан- 31, толық емес отбасыдан - 13 және Neet санатты жастардан 2 адам бар.

Ынтымақ Толқын