Тарбағатай ауданында білім саласы бойынша былтыр 3 жоба жүзеге асырылса, биыл 17 жоба жоспарланып отыр.

Биыл бірқатар мектептерге күрделі және ағымдағы жөндеу жұмыстары жүргізілмек. Бұл туралы Өңірлік коммуникациялар қызметі алаңында өткен баспасөз брифингінде Тарбағатай ауданының әкімі Дархан Жөргекбаев айтты, деп хабарлайды Altaynews тілшісі.

Қазір Шеңгелді ауылында 100 орындық мектеп құрылысы басталып кеткен. Сондай-ақ Ақжар ауылында Билялов атындағы мектеп-лицейіне күрделі жөндеу жұмыстары жүргізіліп, ғимараттың жылу жүйесі мен терезелері ауыстырылмақ. Лицейге жаңа модификациялық 2 кабинет және мектеп жиһаздарын алу жоспарда бар.

2023 жылы Тұғыл ауылындағы Тұрар Рысқұлов атындағы мектепті, Құйған орта мектебін және Билялов атындағы мектеп-лицейді
күрделі жөндеуден өткізуге жалпы сомасы 26,0 млн теңгеге жобалық-сметалық құжаттарын әзірлеп, 2024 жылға күрделі жөндеуден өткізуге қаржы қарастыру жоспарланған.

Ауданда жүзеге асырылып жатқан ірі әрі бірегей жоба – «Ауылды жерлердегі тірек мектептерінің әлеуетін арттыру жобасы» аясында «Қазақстан халқына» қоры мен «Білім беру саласын тұрақты дамыту» қоры есебінен 250,0 млн теңге бөлініп, Абай орта мектебі Назарбаев зияткерлік мектебі деңгейінде жабдықталмақ.

Естеріңізге сала кетейік, Мемлекет басшысы Қасым-Жомарт Тоқаев «Әділетті мемлекет. Біртұтас ұлт. Берекелі қоғам» атты Қазақстан халқына Жолдауында білім беру жүйесіне база назар аударған болатын.