Өскемендегі денешынықтыру-сауықтыру кешенінде жаңа дзюдо орталығы ашылады, деп хабарлайды Altaynews тілшісі.

Денешынықтыру және сауықтыру кешенінде 50 жыл бойы жөндеу жүргізілмеген болады. Десе де, мұнда келушілердің саны азаймаған. Күнде мұнда 500-ге жуық жас спортшылар келіп жаттығады. Осы жылы Жұмыспен қамтудың жол картасы бойынша нысанның реконструкциясына қаржы бөлініп отыр.

"Алтайстрой" ЖШС мердігер компания әрлеу төсемін, инженерлік желілерді, еден, терезе және есік жақтауларын демонтаждау бойынша жұмыстарды аяқтап қойыпты. Қазір құбырларды, жылу жүйесін, су құбырлары мен электр желілерін ауыстыру жұмыстары жүргізілуде. Сондай-ақ, кешеннің ғимаратында душ бөлмелерінің, санитарлық тораптың, киінетін бөлмелердің саны артады, спорт залдарындағы еден жаңартылады, кіре беріс есіктер мүмкіндігі шектеулі жандар үшін қолайлы етіп қайта орнатылады, ғимараттың алды мен маңайындағы аумақ жөнделеді.

Алдағы уақытта мұнда дзюдо орталығы ашылмақ. Ол үшін кешеннің бос қалған ғимараты жөндеуден өткізіліп жатыр.

 Барлық жұмыстар 1 қыркүйекке дейін аяқталады деп жоспарлануда.