Шығыс Қазақстан облысының Алтай ауданындағы көпқабатты үйлердің бірінің қабырғасына Абай Құнанбайұлының портреті салынып жатыр, деп хабарлайды Алтайньюс тілшісі.

Ұлы ақынның тұлғасы бейнеленіп жатқан үш қабатты ғимарат Каюпов және Максим Горький көшелерінің қиылысында орналасқан. Суретшілер әуелі ақынның атын жазып, қабырғаның төменгі бөлігін пейзаж түрінде суреттеп, жан-жағын ою-өрнекпен безендірген. Қазір суретшілер ұлы ойшылдың бейнесіне салуға кірісіп кетті. Бұл ретте шеберлер ерекше әдіске жүгінген екен. Абай бейнесін қабырғаға проектор арқылы түсірген.

Суретші өз жұмысын жақын арада аяқтауды көздеп отыр. Сондай-ақ өнерпаздар бұл жұмысты Абайдың 175 жылдық мерейтойына тарту ретінде көпшілік назарына ұсынбақ.