«Алтай» жеңісті жолын жалғастыруда. Футболдан бірінші лига командалары арасындағы ел чемпионатының сегізінші турында өз алаңында Алматының «Қайрат-Жастар» командасын қабылдаған семейлік ұжым қарсыласын 2:0 есебімен тізе бүктіріп, жеңіс сериясын үш ойынға дейін ұзартты.

Еске салайық, бұған дейін жерлестеріміз Шымкенттің «Академия-Оңтүстігі» мен Қызылорданың «Байқоңырынан» сәйкесінше 3:0 және 3:1 есебімен басым түскен болатын. Қазір көш басындағы «Алтай» екінші орындағы ақтаулық «Каспий» командасынан төрт ұпайға ұзап тұр.

Семейдің «Спартак» стадионында өткен бұл жолғы матчтың есебі 14-ші минутта ашылды. Көзге түскен шабуылшы Дәурен Қайқыбасов болды. Ал 70-ші минутта есеп 2:0-ге жетті. Бұл жолы тәжірибелі жартылай қорғаушы Алексей Шакинның қанжығасы майланды. Қорытынды есеп 2:0.

Келесі кездесуін жерлестеріміз 31 мамыр, жұма күні Нұр-Сұлтан қаласында жергілікті «Астана» клубының жастар қомандасымен өткізеді.