ШҚО-да ағымдағы жылы 242 шақырым жол жөнделмек. Аталмыш мақсатта жеті миллиард теңгеден астам қаржы бөлінген.

Бұл туралы ШҚО әкімінің бірінші орынбасары Алмасхан Сматлаев мәлімдеді, деп хабарлайды Altaynews тілшісі.

Алмасхан Сматлаевтың айтуынша, 10 шілдеге дейін елді мекендердің барлық көшелерінде шұңқырларды жөндеу жұмыстары толықтай аяқталуы тиіс.

Сондай-ақ биыл Бұқтырма су қоймасы арқылы көпір салу жобасын қосымша қаржыландыру жүргізіледі. Қазіргі уақытта жеті тірек орнатылды. Ал көпірге барар жолдың 18 шақырымында барлық жұмыстар толықтай аяқталған.

Естеріңізге сала кетейік, бұған дейін Алтай және Риддер қалаларында «Сергек» бейнебақылау камералары орнатылатынын жазған болатынбыз. Аталмыш жүйе арқылы облыс орталығында құқық бұзушылықтар мен қылмыс саны едәуір азайған болатын. Биыл Алтайда – 154, Риддер қаласында 249 камера орнатылмақ.