Жаңа жыл түні облыс орталығының бірнеше ауданында мерекелік шаралар ұйымдастырылды. Солардың негізгісі Республика алаңында өтті. 

Концерт, би сайысы, түрлі ойын-сауық және көңіл көтеру бағдарламалары, ақтарылған ақжарма тілектер қала тұрғындары мен қонақтарына таңғажайып жаңажылдық кеш сыйлады, деп хабарлайды Altaynews.kz тілшісі.
Өскеменнің орталық алаңында бұл түні ертегі кейіпкерлері мен аниматорлар көпшілікпен бірге Ұлу жылын қарсы алса, мерекенің басты кейіпкерлері Аяз ата мен Ақшақар балақайларға сыйлық үлестірді. Жиналған жұртшылық ішінен сахнаға шығып, би сайысына қатысқан балдырғандарға Өскемен қаласы әкімдігі тарапынан соңғы үлгідегі ұялы телефон, “Алиса” сияқты бағалы сыйлықтар берілді.
Түн ортасы ауған шақта ел Президенті Қасым-Жомарт Тоқаевтың құттықтауы үлкен экраннан көрсетілді. Мемлекет басшысының сөзінен кейін сахнаға Өскемен әкімі Жақсылық Омар шығып, қала тұрғындары мен қонақтарына құттықтау тілегін айтты.

Мерекелік концерт соңында  әдеттегідей жиналған көпшілік қала аспанын мың сан түске бояп, күндей күркіреген отшашуды тамашалады.