Бүгін ШҚО әкімінің бірінші орынбасары Нұрымбет Сақтағанов Өскемендегі электротехникалық құрылғылар шығаратын «Кэмонт» АҚ жұмысшыларымен кездесіп, цехтармен, технологиямен және шығарылатын өнім үлгілерімен танысты.

Еліміздегі іргелі кәсіпорындардың бірінен саналған бұл зауыттың қазіргі жағдайы мәз емес, деп хабарлайды Altaynews.kz тілшісі.

Бір кездері өндірісі өрге басқан компанияның өнімдеріне деген сұраныс кейінгі жылдары азайып кеткен. Соның салдарынан біраз қиындықтар туындаған. Зауыттың өз жұмысшылары алдында жалақы қарызы жиналған. Сонымен қатар кәсіпорынның өзге мекемелер алдында да орындамаған міндеттемелері үшін берешегі бар.

Нұрымбет Сақтағанов еңбек ұжымының өкілдерімен сөйлесіп, кәсіпорында өндірістік қызметті қалпына келтіру бойынша қандай шаралар қабылданып жатқанын білді. Қазір компания қарыздарына қатысты іс сотта қаралып, несие беруші банкпен арада келіссөздер жүргізіліп жатыр.

Бүгінгі таңда «Кэмонт» АҚ-да 341 адам еңбек етуде. Компания басшылығы жұмысшылардың жалақысын төлеуден қашпайтынын, өткен желтоқсан айының еңбекақысын біртіндеп төлеп жатқанын мәлім етті.

Зауыт ұжыммен кездесіп, тілдескен ШҚО әкімінің бірінші орынбасары Нұрымбет Сақтағанов кәсіпорындағы қалыптасқан жағдай аймақ басшысының жіті назарында екенін атап өтті.

Компания басшылығы шығарылатын өнімді Шығыс Қазақстан аумағында квазимемлекеттік және жеке сектор кәсіпорындары, жер қойнауын пайдаланушылар сатып алмайтынын атап өтті.