Асубұлақтағы Мәдениет үйі отыз жылдан кейін жөнделді
Ұлан ауданындағы Асубұлақ ауылының Мәдениет үйі жөнделді. Бұл нысан отыз жыл бойы жөндеу көрмеген, деп хабарлайды Altaynews.kz тілшісі.
Ауыл тұрғындары сайлау науқаны кезінде «AMANAT» партиясының өкілдеріне өтініш білдірген көрінеді. Соның нәтижесінде тозығы жеткен нысанға күрделі жөндеу жұмыстары жүргізілді.
- Біз әрбір нысанның уақытылы тапсырылуы үшін партиялық бақылау бекеттерін қойып, ондағы құрылыс жұмыстарының жүргізілу барысын қадағалап отырамыз. Партия өзінің сайлауалды бағдарламасының сапалы орындалуына баса насар аударады, - дейді «AMANAT» партиясының Шығыс Қазақстан облыстық филиалының жанындағы Партиялық бақылау комиссиясының төрағасы Мұхтар Төлеген.
Асубұлақтағы Мәдениет үйін жөндеу өткен жылы шілде айында басталған, жыл соңында аяқталды. Партияның өңірлік филиалы ұсынған деректерге сүйенсек, жөндеуге 68 миллион теңгеден астам қаражат жұмсалған.
- Ауылдықтар үшін мәдениет үйінің жөндеуден өткендігі өте қуантарлық жағдай болды. Себебі 30 жылдан бері жөндеу көрмей тоз- тозы шығып тұрған еді. Енді осы жерде балаларымыз үйірмелерге, спорттық секцияларға келіп қатысатын болады, - дейді ауыл тұрғыны Тілеубек Айтғазин.
Жаңарған ғимаратта кітапхана, балаларға арналған түрлі үйірмелер, музыка мектебінің филиалы, спорт секциялары жұмыс істейді.
Оқи отырыңыз
