Марқакөлге көрші аудандар көмектесіп жатыр
Жаңадан құрылған Марқакөл ауданын қыс бойы қалың қар әурелесе, көтемде еріген қар суы қарбаласқа салды. Алайда көрші аудандардың көмегі мен жергілікті тұрғындардың ауызбіршілігінің, облыс басшылығының қолдауының арқасында қиыншылықты оңай еңсеріп келеді.
Су тасқынының бірінші толқынында марқакөлдіктерге іргелес жатқан Зайсан және Күршім аудандарынан, сондай-ақ жеке кәсіпкерлерден көмек көрсетілген, деп хабарлайды Altainews.kz тілшісі.
Бұл жолы көрші аудандар еріген қар суы шайып кеткен жолдарды жөндеуге және жолда қалған жолаушыларды орналастыруға қол ұшын берді.
Айта кетейік, Зайсан және Күршім аудандарынан қыстыгүні қар астында қалған Марқакөлге жем-шөп жеткізген болатын. Сондай-ақ, бұған дейін хабарлағанымыздай, Зайсан қаласына барып, жолдың жабылуына байланысты қайта алмай қалған Боран ауылының оқушыларына аудан басшлығы жағдай жасап, интернат-үйге орналастырды.