Балалар өрт сөндіріп, адам өмірін құтқарды – ШҚО
Жазғы маусым бастала салысымен ШҚО ТЖД және Апаттық медициналық орталығының қызметкерлері қала сыртындағы сауықтыру лагерлерінде қауіпсіздік шаралары бойынша сабақтар өткізе бастады.
Дәстүрлі түрде ұйымдастырылатын шара бұл жолы «Алау» балалар лагерінде өтті, деп хабарлайды Altainews.kz сайты.
Мұндағы алғашқы ауысым жуықта ғана ашылды. Қазір лагерьде 340 бала демалып жатыр.
- Сабақтарды ерекше етіп өткізуге тырыстық. Құтқарушылар түрлі викториналар, конкурстар мен эстафеталар ұйымдастырды. Бүлдіршіндердің қызығушылығын ояту үшін өрт сөндіру жаттығуларын жасап, адамды судан құтқарып, алғашқы көмек көрсетті, - дейді ШҚО ТЖД баспасөз қызметі.
ТЖ қызметкерлері балаларды құтқару құралдарын пайдалануға, қауіпсіз жағажайларды анықтауға, ормандағы өрттің алдын алуға үйретті.
- Балалармен жұмыс істеу - біздің қызметіміздің маңызды бағыттарының бірі болып табылады. Біз тыйым салынған шомылу орындарын үнемі тексеріп отырамыз, қайықпен патрульдеп, халықпен сөйлесеміз. Рейдтер барысында және бұқаралық ақпарат құралдары арқылы балаларды бір сәт қараусыз қалдырмас үшін ата-аналарға нұсқаулық беріп отырамыз, - деп атап өтті ШҚО ТЖД бастығының орынбасары Қуатбек Кенжебекұлы.
Мұндай сабақтарды ШҚО ТЖД қызметкерлері барлық жазғы каникул бойы өткізетін болады.
Оқи отырыңыз
