Өскеменде кәріз қақпақтарын ұрлағандар ұстатпай кетіп жүргендігін жазғанбыз осыдан үш ай бұрын. «Жаз басталғалы осындай ұрлық түрі көбейді. 25 кәріздің аузы ашық жатыр», деп дабыл қаққан болатын «Өскемен-тәртіп» мекемесінің баспасөз хатшысы Әсел Ахметжанова.

Міне, жаз бітіп күз басталды енді. Сонда да металл қақпақтар «жоғала беруін» қоймапты. Жақсы жаңалық па, жаман жаңалық па – білмейміз. Осындай қақпақтың бесеуін көліктің артына басып алып бара жатқандар қолға түсіпті.

Артқы бөлігі жер сызып, ішіндегі жүкті әрең тартып бара жатқан көлік тәртіп сақшыларына күдікті көрінеді. Көлікті бір тексеріп көруге шешім қабылдайды олар.

Нәтижесінде мәшиненің жүк салғышынан 5 металл қақпақ тәркіленеді. Ал көлікте 19-21 жас аралығындағы үш жігіт болған екен.

– Жігіттер Индустриальный және Ватутин көшелерінен 5 кәріз қақпағын алып бара жатқан, – деді ШҚО Ішкі істер департаментінің баспасөз хатшысы.

Күдіктілерге қатысыты сотқа дейінгі тергеу амалдары басталды.