Павлодардан ұрланған көлікті қалбатаулық  патрульдік полиция қызметкерлері анықтап, ұрыны құрықтады.

Қыркүйектің 9-нан 10-на қараған түні ШҚО ІІД Жол  патрульдік полициясы ротасының қызмет инспекторы, кіші лейтенант Мейіржан Жақсыбек және кіші лейтенант Бекзат  Мухамеджанов өздерінің кезектерін қабылдап, жұмыстарына кіріскен еді. Қалбатаудан Аягөздің шекарасына дейінгі жолды бақылауға шыққан олар жол ортасына тоқтап тұрған автокөлікті байқап қалады. Тексеру барысында оның ұрланған көлік екенін анықтаған.

-Біздің тас жол Қалбатаудан Аягөздің шекарасына дейін. Біз Балықтыкөл деген жерге дейін барып, кері қайттық. Жаңғызтөбеден Қалбатау бағытындағы аралықта жолдың ортасында бір көлік тұр екен. Көлік сынып тұр ма деп тоқтадық. Жақындап, қарасақ, есігі ашық, кілт орнында. Біреу ауырып қалды ма деп, маңайды қарап, ешкімді көрмедік. Кезекші бөлімге хабарлап едік, көліктің Павлодардан ұрланғаны анықталды, - дейді кіші лейтенант Мейіржан Жақсыбек.

Полицейлер Жарма аудандық ішкі істер бөліміне хабарласып, жедел әрекет ету тобын шақыртқан. Топ келгенше жақын маңды қарап жүріп, қашып бара жатқан адамды көріп тоқтатады.

-Қашқан адамның қылмыскер екендігін нақты білмегендіктен, алдымен жөнін сұрадық. Серіктесім оның жағдайын тыңдап, мән-жайды анықтағанша, мен қайта кезекші бөлімге хабарласып, көлікті ұрлаған адам туралы ақпарат алдым. Берілген сипаттама біз ұстаған адам екенін түсінгеннен кейін, оны жедел әрекет ету тобы келгенше сөзге айналдырып тұрдық, - дейді  Мейіржан Жақсыбек.

Құрықталған ұры алғашында өзінің кінәсін бірден мойындамай, адасқанын, Өскеменнен Семейге жол тартып бара жатқанын айтып жалтармақ болған. Ұрланған көлік тәркіленіп, күдікті азамат қамауға алынды.

Айым Касембаева