Өскеменде арық қазып жатқан жұмысшы үйінді астында қалып қойды, деп хабарлайды Алтайньюс тілшісі.

Бажов көшесінің бойында арық қазып жатқан жұмысшы кенет опырылған дымқыл топырақтың астында қалып қойған. Бұл кезде оның қасында үш әріптесі болған. Жұмысшылар дер кезінде құтқарушыларды шақырып үлгерген.

Арықтың тереңдігі 2 метр болғанына қарамастан, басын топырақ баспаған. Куәгерлер үйіндінің ауыр болғаны соншалық, уақыт өткен сайын астындағы адамның тыныс алуы қиынға соққанын айтады. Шығыс өңірлік аэроұтқыр құтқару жасағының мамандары оны күрекпен аршып алған.

«Құтқару жұмыстары 1 сағатқа созылды. Ең бастысы, ол естен танған жоқ, бізбен сөйлесіп жатты», - дейді құтқару жасағының басшысы Сергей Голубев.

Зардап шегуші үйінді астынан шығарылған бетте жедел жәрдем қызметкерлеріне тапсырылды. Оның денесінен ешбір сынық пен жарақаттың белгісі байқалмағанымен, толық зерттеуден өткізу үшін ауруханаға жатқызылды