Шығыстың татами шеберлері олжалы оралды
Шығысқазақстандық жас татами шеберлері Алматыдан олжалы оралды. Қазақстан дзюдо федерациясының құрметті президенті Бекет Махмұтовтың жүлдесі сарапқа салынған Азия кубогы жарысында жерлестеріміз алты жүлдені қанжығаларына байлады.
Аталмыш жарысқа Қазақстан, Қырғызстан, Өзбекстан, Тәжікстан мен Оңтүстік Корея елдері атынан 200-ге жуық спортшы қатысқан болатын. Дүбірлі додада Қазақстан құрамасының өзге өкілдері сияқты біздің дзюдошылар да тамаша өнер көрсетіп, алты жүлдеге ие болды. Әсіресе, 78 келіге дейінгі қыздар бәсекесінде алтын жүлде иегері атанған Назерке Тілеуханованың жетістігін атап өткен орынды.
Тағы бес дзюдошымыз, атап айтсақ, Қуаныш Ратаев (81 келі), Айдар Хасенов (90 келі), Ілияс Қалидолда (100 келіден жоғары салмақ), Еркежан Махмұдова (44 келі) мен Әнел Наурызбаева (78 келіден жоғары салмақ) жарыстың қола жүлдегері атанды.