Күршім ауданындағы Топтерек ауылының тұрғындары сыртқы әлеммен байланыссыз қалды. Елді мекенді топан су басу қаупі болмағанымен, толассыз жауған жауын-шашынның салдарынан өзеннің ернеуі тасып, Күршім ауылымен жалғап тұрған көпірді  шайып кетті. Адамдар қайықпен қатынауда.

Көпірден Топтерекке дейінгі аралық шамамен 4 шақырымды құрайды. Қазір жол жабылып, жүзу құралдарымен қатынау ұйымдастырылған, пост қойылды. Шығыс аймақтық аэромобилді жедел құтқару отрядының мамандары  ауданның құтқарушыларымен, жергілікті полиция қызметі, әкімдіктің көмегімен топтеректіктерді, азық-түлікті қайықпен жеткізуде.

Бір жағадан екіншісіне қазірдің өзінде он адам қайықпен өтті, ішінде үш бала бар. Қауіпті аумақ тәулік бойы бақылауға алынған.