Бір жылға жуық кідірістен кейін Риддерде тұрғын үй-коммуналдық шаруашылығын жаңғырту бағдарламасы бойынша ескі үйлерді жөндеу жұмыстары қайта қолға алынды, деп хабарлайды Аltaynews.kz тілшісі.

Естеріңізге салсақ, осыдан бір жыл бұрын жөндеу жұмыстарының тоқтап қалуына қала тұрғындарының орындалған құрылыс сапасына көңілдері толмауы себеп болған-ды. Нақтырақ айтқанда, Тәуелсіздік даңғылы бойындағы бес қабатты үй қолданысқа берілген соң, шатырынан су ағып, екі пәтердің төбесі опырылған. Тағы бір үйдің шатыры қатты желден жұлынып кеткен. Осындай олқылықтарды болдырмау үшін, Курека көшесіндегі 24-ші үйдің тұрғындары «ШҚО бойынша тұрғын үй-пайдалану басқармасы» ЖШС-мен 15,2 млн. теңгеге шарт жасасып, жөндеу жұмыстары жүргізілуде. Бүгінгі күні 600 шаршы метр көлемде төбе жабыны ауыстырылып, инженерлік жүйелер қайта құрылды.