Көкпекті ауданындағы Миролюбовка ауылында «Жұмыспен қамтудың жол картасы-2020» бағдарламасы аясында жаңа наубайхана ашылды. Ауданға жасаған сапары барысында «Рахат-нан» деп аталатын нысанның жұмысымен танысқан облыс әкімі Бердібек Сапрарбаев шалғай елді мекендерде қарапайым тұрғындардың кәсібін ашқаны құптарлық іс екенін, алайда ауылда тұрып өз азығын қамдауға құлықсыздық белең алып кетпеуі керектігін айтты, деп хабарлайды Аltaynews.kz тілшісі.

Жеке кәсіпкер Ләззат Құдайбергенова осы наубайхананы ашу арқылы өзі мен жолдасынан бөлек тағы екі адамды жұмыспен қамтып отыр. Күніне 400 бөлке нан пісіруге қауқарлы пештер Өскеменнен алынған екен. Жұмыс қалыпқа түскесін тоқаштың түр-түрін пісіріп, туристер мен жолаушыларға сатуды жоспарлап отырған кәсіпкер бүгіннің өзінде ауылдастарын нан-тоқаш өнімдерімен қамтамасыз етіп отыр.

Несиеге берілген екі млн.теңгеден бөлек наубайханаға тартылған инфрақұрылымның 1,2 млн теңге шығыны мемлекет есебінен өтелмек.