ШҚ облыстық ІІД-нің бастығы Рашид Жақыповтың бастамасымен тұңғыш рет департамент қызметкерлерінің балаларына арналған ерекше мерекелік іс-шара ұйымдастырылды, деп хабарлайды Аltaynews.kz тілшісі.
Шара барысында мектеп табалдырығын аттағалы отырған 19 бүлдіршінге оқу үрдісіне қажетті барлық кеңсе тауарлары салынған аспалы сөмкелер сыйға тартылды.
Ата-аналар мен балаларды облыстық ІІД-нің бастығы Рашид Жақыповтың атынан оның орынбасары Жанболат Қалетаев пен ардагер Нұрлыбек Үдербаев құттықтап, білім әлеміне алғаш рет қанат қаққалы отырған балғындарға ақ жол тіледі.
– Мен биыл Ахмер орта мектебіне бірінші сыныпқа барамын. Мектепке қажеттінің барлығы салынған аспалы сөмке қатты ұнады. Бірақ, өзі өте ауыр. Бізге осындай керемет сыйлық жасағаны үшін алғысым шексіз, – дейді департаменттің ерекше сыйлығына ие болған балғынның бірі Әлия Оспанова.
Жанболат Қалетаевтың айтуынша, аталмыш шара бұдан былай игі дәстүрге айналып, жыл сайын өткізілмек. Бұл мақсатқа арнайы қаржы бөлінген.
Әсел Асқарқызы
