2013 жылы 24-29 маусымда Варшава қаласында денсаулығының мүмкіндігі шектеулі балаларға арналған «Интеллектуалды марафон» халықаралық олимпиадасы өтті. Осы білім додасында Қазақстанның намысын облысымыздың денсаулығының мүмкіндігі шектеулі 5 дарынды оқушысы қорғап, жүлделі орындармен оралды , деп хабарлайды Аltaynews.kz тілшісі.

Олардың ЮНЕСКО-ның қолдауымен Польшаның Білім министрлігі ұйымдастырған олимпиадаға қатысуына Шығыс Қазақстан облысының әкімдігі, сондай-ақ ШҚО білім басқармасы, ШҚО кәсіпкерлік пен өнеркәсіп басқармасы, ШҚО жастар саясаты басқармасы қолдау көрсетті.

І халықаралық олимпиадаға Ресейден, Белорусиядан, Польшадан, Словакиядан, Қазақстаннан дарынды балалар қатысты.

Олимпиада «Математика», «Физика», «Биология», «Экология», «Информатика» пәндері бойынша өтті. Қатысқан оқушылар бес пәннің барлығынан да тапсырмалар орындады.

Қатысушылардың жұмысын шетелдік жетекші жоғарғы оқу орындарының ғалымдарынан құралған білікті қазылар алқасы бағалады.

Олимпиада қорытындысы бойынша Семей қаласындағы көздері нашар көретін балаларға арналған №3 облыстық мектеп-интернаттың оқушысы Самарханов Дамир «Экология» пәнінен күміс жүлдегер, «Математика», «Физика» пәндерінен қола жүлдегер атанды. Абсолютті ІІ орны үшін (бес пәннен иеленген барлық ұпайларды қосқанда) дипломмен марапатталды.

Өскемен қаласының №19 ОМ оқушысы Калинко Надежда, Семей қаласындағы көздері нашар көретін балаларға арналған №3 облыстық мектеп-интернаттың оқушылары Ермаков Демеу, Төлеуханова Айзат «Экология», «Биология» пәндерінен ІІІ дәрежелі дипломмен марапатталды.

Өскемен қаласының №1 ОМ оқушысы Дүйсембеков Махамбет «Жеңіске ұмтылысы үшін» номинациясында грамотаға ие болды.

Олимпиаданың жалпы қорытындысы бойынша Қазақстан командасы командалық үшінші орынды иеленіп, ІІІ дәрежелі дипломмен, кубокпен марапатталды.

Балалардың барлығы халықаралық олимпиаданың сертификатымен, медалімен марапатталды.