26 желтоқсан мен 6 қаңтар аралығында Канадада өтетін хоккейден жастар арасындағы Әлем біріншілігіне өскемендік «Алтай» және «Алтай-Торпедо» командаларының үш ойыншысы қатыспақ.

Дәлірек атсақ, жаһандық додаға бүгінде «Алтай» сапында өнер көрсетіп жүрген қақпашы Владислав Нурек пен «Алтай-Торпедоның» ойыншылары – қорғаушы Ярослав Хрипков және шабуылшы Данил Третьяковский баратын болды.

Айта кетейік, ұлттық құрама 5-6 желтоқсан күндері Астана қаласында Әлем біріншілігі алдындағы соңғы оқу-жаттығу жиындарын өткізеді. Ал 28 желтоқсан күні отандастарымыз чемпионат аясындағы алғашқы ойынын ойнайды. Астана уақытымен сағат 9:30-да басталатын бұл кездесуде біздің хоккейшілер Финляндия құрамасымен күш сынасады.

Естеріңізге салайық, ағымдағы жылдың көктемінде жоғары дивизион командалары арасындағы Әлем чемпионатына қатысуға мүмкіндік алған қазақстандық хоккейшілер жеребе нәтижесі бойынша В тобына түскен болатын. Аталмыш топта отандастарымыз Финляндия, АҚШ, Словакия және Швеция құрамаларына қарсылас атанбақ.