Жоғары хоккей лигасының тұрақты чемпионатында қатарынан бес ойында жеңілістің кермек дәмін татқан өскемендік «Торпедо» алтыншысында әйтеуір дегенде жеңіске жетті. Жеңіс болғанда қандай, Мисхат Фахрутдинов шәкірттері өз айдынында красноярскілік «Соколдың» тас-талқанын шығарды.

Бұл кездесудегі есепті бірінші кезеңнің алтыншы минутында «Торпедоның» тәжірибелі шабуылшысы Евгений Рымарев ашты. 15-ші минутта қонақтар таразы басын теңестіргенімен, арада бір минут өтпей жатып айдын иелері екінші рет алға шықты. Нәтижелі соққының авторы – Евгений Белухин.

Үзілістен кейін өскемендік хоккейшілер қарсылас қақпасын тағы екі мәрте дәл көздеп, есепті 4:1-ге жеткізді. Бірақ, торпедолықтар бұған да қанағат қылған жоқ. Соңғы жиырмаминуттықта красноярскілік команданың қақпасында тағы төрт шайба тулады. Бұған әбден есеңгіреген қонақтар екі-ақ дәл соққымен жауап қайыра алды.

Қорытынды есеп 8:3!

Бірінші кезеңде көзге түскен хоккейшілерден бөлек бұл ойында Андрей Белозеров (хет-трик), Максим Капитуров, Александр Шин мен Кирилл Тамбиевтің қанжығасы майланғанын айта кету керек.

Осы жеңісінің арқасында 14 ұпайға ие болған өскемендік ұжым турнир кестесінің 13-ші сатысына дейін көтерілді.

Алдағы сенбі күні жерлестеріміз өз айдынында новокузнецкілік «Металлургті» қабылдайды. Ойынның басталуы кешкі сағат 17:00-де.