«Әйел – бір қолымен бесікті тербетсе, екінші қолымен әлемді тербетеді» деген тәмсіл бар халқымызда. Бүгінде қоғамда әйел адамның орны ерекше екеніне дау жоқ. Ұлттың болашағы да, ұрпақтың тәрбиесі де, отбасының берекесі де сол нәзік жандының қолында.

Ерлермен қатар иық тіресе жұмыс істеп, қатаң тәртіпке бағынып, жауапкершілігі жоғары міндетін мінсіз атқарып, отбасындағы қызметін де қатар алып жүрген қыз-келіншектер қашанда құрметке  лайық. Сондай жандардың бірі Жанар Мұқашеваның да прокуратура саласында еңбек еткеніне 20 жылдан астам уақыт болған. Бүгінде облыс прокурорының аға көмекшісі болып қызмет істейтін ол мамандығының қиын да, қызықты шақтарымен бөлісті.