Өзінің фотосуретін педофилдердің тізімінен көрген Алтай ауданының тұрғыны полицияға шағымданды, деп хабарлайды Алтайньюс тілшісі.

Өткен жылы әлеуметтік желілерде бірнеше адамның фотосуреті бар парақша тараған еді. Суреттің астында « «Педофил» санаты бойынша Зырян аудандық ІІБ-де есепте тұрған тұлғалар» деп жазылған болатын.

Желіден өзінің суретін көріп, аң-таң болған Алтай ауданының тұрғыны Николай Белоусов полицияға арызданып, жалған ақпарат таратушыларды жазалауды талап етті.

– ІІМ деректер базасын тексеру барысында Николай Белоусовтың осы санат бойынша ешқашан есепте тұрмағаны анықталды, – деп хабарлады Зырян аудандық полиция бөлімшесінің бастығы Шалқар Құнанбаев.

Өкінішке қарай, полиция қызметкерлері суретті әлеуметтік желілерге жүктеген адамды таба алмай отыр.