Республикалық БАҚ еліміздегі қала әкімдерінің жұмысына мониторинг жүргізіп, әлеуметтік желідегі парақшаларын да назарға алды. Ондағы жарияланымдар бойынша шенеуніктердің жергілікті тұрғындармен кері байланысы, кездесулері мен іс-шараларға қатысуы бағаланған.

Бұл рейтингте Өскемен қаласының әкімі Жақылық Омар көш бастап тұр, деп хабарлайды Altaynews тілшісі.

Президент Қасым-Жомарт Тоқаев Үкіметте өткен еліміздің әлеуметтік-экономикалық даму мәселелері жөніндегі кеңейтілген кеңесте қалалардың келбеті онша еместігін айтып, әкімдерді көшелерді жаяу аралауға шақырған болатын.

Республикалық рейтингте бірінші орынға Өскемен қаласының әкімі Жақсылық Омар, екінші орынға Көкшетау қаласының әкімі Бауржан Гайса тұрақтаса, үздік үштікті Павлодар қаласының әкімі Ержан Иманзаипов түйіндеген.

Аталған үш әкім әлеуметтік желіде кеңседен қарағанда, сыртта көп уақыт өткізетіндіктерін көрсеткен. Бірі атқарылған жұмыстар туралы есеп беріп, белгілі бір нысандарды араласа, кейбірі халықпен жүздесуге жиі барып, тікелей эфир жүргізгенін жариялаған.