– Қазір 19-шағын ауданға, КШТ жаққа басымдық бердік. Қаланың орталығына қарағанда бұл жақта ағаш аз. Сондықтан күшті осы жаққа салып жатырмыз. Әсіресе Тәуелсіздік монументі, Қазыбек би, І.Есенберлин даңғылы, Әл-Фараби даңғылына көңіл бөлеміз. Осы аумақтарды көгалдандыру керек, – дейді шаһар әкімі Жақсылық Омар. – Бұл жұмысты ғылыми негізге сүйеніп істейміз. Әр талдың түбіне тамшылатып суару құрылғысы қойылады. Бұл жақтың топырағы тастақты, ағаш өсіру қиын. Жоспар бойынша, екі аптаның көлемінде 380 көшет отырғызамыз. Бұрын қалыптасқан науқаннан алыстадық. Осыған дейін 200-300 студентті шақырып, солардың қолына мыңдаған көшетті тапсыратын. Олар қалай болса солай отырғызып, одан кейін ол көшет солып қалатын. Ал қазір мердігерлер біртіндеп, уақытылы егеді. 2-2,5 метрлік ағаштарды отырғызу керек. Олардың өсуі тез. Біз олардан тез өсетін ағаштарды отырғызуды талап еттік.

– І. Есенберлин даңғылына жолдың екі жағына көшет отырғызамыз. Жөке, қайың, шаған, шетен ағашын егеміз. Ағаш егу жұмысы осы жылға жоспарланған. Қазір ағаш егуге ең қолайлы кезең. Яғни, көктем мен күз кезі, – дейді ағаш отырғызуға жауапты мердігер Михаил Журавлев.