Өскемен: Tartyl Fest жеңімпаздары марапатталды
Бүгін облыс орталығындағы «Самал» саябағында «OSKEMEN TARTYL FEST» турникке тартылу фестивалі өтті.
Аталмыш шара қала күні мен Конституция күні аясында ұйымдастырылған, деп хабарлайды Altainews.kz тілшісі.
Әр түрлі жастағы және салмақ дәрежесіндегі ер адамдар турникке тартылып, бәсекеге түссе, әйелдер арасында планкаға тұрып жарысты.
- “Tartyl fest” фестивалі биыл екінші жыл қатарынан ұйымдастырылып отыр. Биылғы жүлде қоры 800 мың теңгені құрайды. Ерекше көзге түскен қатысушыларға да алғыс хат пен сыйлықтар табыс етеміз, - деді Өскемен қаласының дене шынықтыру және спорт бөлімінің қызметкері Әділет Маратұлы.
Сайысқа қатысушылардан бөлек, көрермендер де жиналыпты. Қатысушылар мұндай іс-шаралар жастардың салауатты өмір салтына бейімделіп, өздерін көрсетуге үлкен мүмкіндік беретінін айтады.
- Өзім биыл алғаш рет қатысып отырмын. Дәстүрлі түрде ұйымдастырылса жылда қатыссам деп жоспарлап отырмын. Қала тұрғындарының, әсіресе жастардың белсенділік танытуы қуантады, - дейді қатысушы Әділет Есімханов.
Фестиваль соңында барлық қатысушыларға естелік сыйлықтар табыс етіліп, жеңімпаздар лайықты марапаттарға ие болды.
Оқи отырыңыз
