Мектептерде бірінші тоқсан аяқталуға шақ қалды. Оқушылар осы күзгі демалыста жеті күн демалады екен.

Оқу-ағарту министрлігінің ақпараты бойынша, күзгі демалыс 2023 жылдың 30 қазанынан 5 қарашаға дейін жалғасады, деп хабарлайды Аltaynews.kz сайты.

Сондай-ақ министрлік оқушылардың күзгі демалысты және бос уақытты тиімді өткізуі әрі тұлғалық жетілуі мақсатында «Бірыңғай тәрбие бағдарламасы» аясында іс-шаралар жоспарын ұсынып отыр.

 Іс-шаралар жоспары мыналарды қамтиды:

- жоғарғы сынып оқушылары және ата-аналарымен бірлесіп, ғылыми-жобалық жұмыстардың мазмұнына қарай ақпараттық-танымдық сабақтар, ЖОО оқытушыларымен кездесулер ұйымдастыру, ғылыми жобалар туралы сұхбат өткізу;

 - «Балалар кітапханасы» жобасын іске асыру аясында оқырмандармен кездесулер өткізу және оқыған кітаптарын талқылау;

- «Отбасы дәстүрлері» тақырыбында ата-аналар жиналысын, «педагог-бала-ата-ана» бірлесіп отбасы дәстүрлері туралы сұхбат өткізу;

- Қожа Ахмет Яссауидың 930 жылдығына орай оқушылар арасында «Қожа Ахмет Яссауидың даналық ілімі» тақырыбына эссе, жобалық жұмыстар жаздыру;

- балалардың ең үздік жұмыстарын атай отырып, «Өнегелі өмір» тақырыбына оқушылар арасында эссе байқауын өткізу;

- ата-аналар және оқушылармен бірлесіп салауатты өмір салты бойынша «Денсаулықтың 6 шарты – таза ауа, дұрыс тамақтану, қозғалыс, тыныш ұйқы, күйзеліссіз жақсы көңіл-күй» тақырыбына іс-шаралар өткізу;

- «Әкеге - ардақ, анаға - тағзым» тақырыбына «Жас ақындар айтысы» байқауын ұйымдастыру, жеңімпаздарды марапаттау.

 Ведомство бұл  іс-шаралардың білім беру ұйымдарына әдістемелік ұсыныс ретінде жіберілетінін атап өтті.