ШҚО-да күн райы бұзылып, найзағай ойнап, бұршақ жауып, қатты жел соғады.

«Қазгидромет» ШҚ филиалының дерегінше, 22 маусымда облыстың солтүстігінде, шығысында, оңтүстігінде найзағай ойнайды деп болжанған, деп хабарлайды Altaynews тілшісі.

Күндіз облыстың солтүстігінде, шығысында, оңтүстігінде бұршақ жауады. Жел батыстан, солтүстік-батыстан соғады. Күндіз аймақтың солтүстігінде, шығысында, оңтүстігінде желдің күші 15-20 м/с болмақ.

Облыстың шығысында төтенше өрт қаупі сақталады. Өскемен қаласында түнде және таңертең найзағай күтіледі.

Осындай күн райы кезінде сақтық шараларын орындау қажет.

Найзағай кезінде далада жүруге болмайды. Электр желілеріне немесе биік ағаштарға жақындамау қажет. Металл қоршаудың, болат құбырлар мен рельстердің, басқа электр өткізгіштердің жанында тұрмаған жөн. Ауылшаруашылық техникасына және мотоцикл, велосипед сияқты шағын көліктерге жақындауға болмайды. Найзағай кезінде ашық жерде, далада қалып қойған жағдайда құрғақ шұңқырда, жартаста жасырыну керек. Жүзіп жүрген немесе қайықпен су айдынына шыққан жағдайда мүмкіндігінше тезірек жағаға шығуға тырысу қажет. Су – электр өткізгіш.

Жел соққанда үйдің қабырғасына, аялдама, жарнама қалқанының астына, тоғай арасына жасырынуға, үзілген сымдар мен шайқалып тұрған құрылымдарға жақындауға болмайды. Көлікті гаражға қою қажет. Алайда көлікті шіріген ағаш не нашар бекітілген конструкция жанына қоймаған жөн.

Өрт қауіпсіздігі ережелерін ұмытпау қажет. Ашық отты пайдалану кезінде абай болған жөн. Үйлер мен ғимараттардың жанында от жағуға, құрғақ шөп және қамысты өртеуге болмайды. Автокөліктерден сөндірілмеген темекі, шыны ыдысты тастау қауіпті.

ТЖ туындаған жағдайда «101», «112» нөміріне қоңырау шалу қажет.