ШҚО ПД бастығы полиция генерал-майоры Ерлан Омарбеков ішкі істер органдары ардагерлер кеңесінің активімен кездесті. Облыстың бас полицейі бейресми жағдайда ардагерлермен бірге өңірдегі жедел жағдайды, жеке құрамды толғандыратын проблемалық мәселелерді, тәлімгерлерден түскен ұсыныстарды талқылады.

Ерлан Омарбеков қазіргі уақытта полицияның алдында тұрған міндеттер туралы айтты, деп хабарлайды Altaynews тілшісі.

ПД бастығы, ең алдымен, 2024-2028 жылдарға арналған қоғаммен серіктестікте қоғамдық қауіпсіздікті қамтамасыз ету тұжырымдамасының жобасын жеткізді.

ШҚО ІІО және Ұлттық ұлан ардагерлер кеңесінің төрағасы Нұрлыбек Үдербаев ардагерлер өңірдегі қауіпсіздік пен тұрғындардың тыныштығын қамтамасыз етуге көмектесетін барлық бастамаларды қолдауға дайын екенін жеткізді.

Департамент басшысы бүгінде жас қызметкерлерді тәрбиелеуде және ұрпақтар сабақтастығын қалыптастыруда ішкі істер органдары ардагерлерінің рөлі жоғары екенін, бұл тәжірибе басшылар үшін де, полиция қызметкерлері үшін де құнды екенін атап өтті.

Қазіргі уақытта ШҚО ПД-да реформалау және тәлімгерлік процестеріне 27 ардагерлер ұйымы енгізілген.