ШҚО Тарбағатай аудандық ауруханасында салмағы 1700 грамм сәби дүниеге келді.

Ай-күнінен ерте туған нәресте тиісті ем-дом алуы үшін Өскемен қаласындағы арнайы орталыққа жеткізілуі қажет, деп хабарлайды Altaynews тілшісі.

Тарбағатай аудандық ауруханасына сапары кезінде ШҚО әкімі Ермек Көшербаев жақында нәрестелі болған аудан тұрғыны Тілеубек Сағатбекпен жолығып, сәбидің амандығын тіледі.

Кішкентайдың әкесі Тілеубек Сағатбектің сөзінше, салмағы 1700 грамм болып туған шақалақ дәрігерлердің ұсынысы бойынша тиісті ем-дом алуы үшін тікұшақ арқылы Өскемендегі Ана мен бала орталығына жеткізіледі.  

Өз кезегінде әкім де бөбек пен анасының жағдайы жақсы болуына тілеулестігін білдірді.

Бұдан бөлек, облыс әкімі аудандық аурухананың техникалық базасы орнықты, бас дәрігері білікті маман екенін айтты. Әкім сапар аясында ауруханаға келушілер мен науқастардың қал-жағдайын білді.