20-22 шілде күндері Орал қаласында Президенттік көпсайыстан “Динамо” ДШСҚ-ның X жазғы ведомствоаралық спартакиадасы мен ІІМ чемпионаты өтті.

Жарысқа елдің әр өңірінен құқық қорғау органдарының, арнайы және күштік құрылымдардың қызметкерлері қатысты, деп хабарлайды Altaynews тілшісі.

Қатысушылар әскери қарудан ату, жүзу, граната лақтыру және әртүрлі қашықтыққа, яғни жас ерекшеліктеріне сәйкес 60, 100 және 1000, 3000 метрге жүгіру бойынша бақ сынасты.

Сайыс нәтижесі бойынша ШҚО полиция департаментінің қызметкері Асылхан Идырысов 40-45 жастағы спортшылар арасында 1-орын иеленіп, чемпион атанды.

Асылхан Идырысов 2016 жылдан бері ШҚО ПД Жылдам қимылдайтын арнайы жасағында инспектор қызметін атқарып келеді. Ол спорттың қиын түрі саналатын Президенттік көпсайыспен қатар күреспен де шұғылданады.

Чемпионаттың жеңімпаздары мен жүлдегерлеріне бағалы сыйлықтар, грамоталар және медальдар табысталды.