Риддер Жылу электр орталығындағы жөндеу-іске қосу жұмыстары белгіленген кестеге сай жүргізілуде. Атап айтсақ, №1, 2, 3 қазандықтардың агрегаттарын жөндеу аяқталуға жақын, экрандардың беттері құрастырылып, орнатылып қойған. Сондай-ақ қазандықтар одан әрі жуып тазалау үшін сумен толтырылыпты.

Риддер қаласының әкімі Дәулет Батырбаевтың сөзіне сенсек, жуу процесі бірнеше сағаттан екі тәулікке дейін созылады екен, деп хабарлайды Altaynews.kz сайты.

Ал мердігер ұйым өкілдері нысандағы барлық жұмыс кестеге сай жүргізіліп жатқанын айтуда. «DM Energy» ЖШС-ның бас инженері Қайрат Досанов бірінші қазандықта дәнекерлеу жұмыстары аяқталғанын, енді мамандар оны толтыратынын және одан әрі гидравликалық сынақтар жүргізетінін атап өтті.

Барлық жөндеу-іске қосу жұмыстары аяқталғаннан кейін риддерліктердің үйлеріне жылу беріле бастайды.