Алдағы уақытта балық шаруашылығын субсидиялау процестері жеңілдетіліп, бөлінетін қаражат мөлшері артатын болады. Бұл туралы Экология және табиғи ресурстар министрі Ерлан Нысанбаев мәлім етті.

Бүгін министрлік басшысы Алтай ауданында орналасқан «Grand fish» ЖШС-нің форель балығын өсіретін фермасында болып, дәл осы жерге жиналған шығысқазақстандық форель өсірушілермен кездесті, деп хабарлайды Altaynews.kz тілшісі.

Тарихқа сәл шегініс жасасақ, Алтай ауданындағы аталмыш шаруашылық жұмысын 2017 жылдың маусым айының басында бастаған болатын.

«Grand fish» ЖШС-нің құрылтайшысы Сергей Медведевтің айтуынша, алғашқыда мұнда 60 мың кемпірқосақ форелінің шабақтары әкелініпті. Қазір фермада өз инкубациялық және шабақ өсіру цехтері жұмыс істеп тұр.

Ал Экология және табиғи ресурстар министрі Е.Нысанбаев бұл мәселе қазір күн тәртібінде екенін жеткізді.

Фермаға сапары барысында Ерлан Нысанбаев форель балығының еті мен уылдырығынан жасалған өнім ассортиментімен де танысты. Белгілі болғандай, қазір бұл тауардың шамамен 80 пайызы экспортқа жөнелтіледі екен.