ШҚО әкімі Ермек Көшербаев электр тарату және реттеу аппаратурасын өндіретін Өскемен конденсатор зауытында болып, өндіріс орнының жұмысымен, шығаратын өнімімен жақынырақ танысты.

65 жылдық тарихы бар аталмыш кәсіпорын ТМД-дағы конденсатор өндірісінің көшбасшысы саналады.  Зауытта жекелеген төмен вольтты және жоғары вольтты конденсаторлардан бастап, 35-330 кВ желілердегі реактив қуаттың орнын толтыру қондырғыларына дейін энергия үнемдейтін жабдықтардың көптеген түрі шығарылады. Айта кететін жайт, өндіріс орны «Ұлттық жоба» аясында жабдықтарын жаңартып, айналым қаражатын толықтырған, деп хабарлайды Altaynews.kz тілшісі.

Белгілі болғандай, бүгінде өзінің сапасымен ерекшеленетін өскемендік зауыттың өнімдеріне көршілес Қырғызстан, Өзбекстан, Тәжікстан, Түркіменстан, Әзірбайжан, Ресей сияқты елдермен қатар, алыстағы Армения, Грузия, Иран, Болгария, Беларусь, Польша, Украина, Венгрия мен Франция мемлекеттерінде де сұраныс жоғары екен. Зауыт басшылығының айтуынша, бұл тізімді әлі де кеңейтуге мүмкіндік мол.

Оның айтуынша, былтыр өскемендік зауыт 6,3 миллиард теңгенің өнімін өндірсе, биылғы жоспар одан да жоғары екен.

                                                                                                                                                       Фото: Евгений Щетников