Офицерлер марапатты Қазақстан Республикасының Ішкі істер министрі, полиция генерал-лейтенанты Ержан Сапарбекұлы Саденовтың қолынан алды, деп хабарлайды Altainews.kz тілшісі.

Есірткі қылмысына қарсы іс-қимыл басқармасы бастығының орынбасары, полиция полковнигі Ринат Икласов есірткі зертханасын сәтті жойып, есірткі қылмысына қарсы күреске қосқан үлесі үшін марапатқа ие болды. Ол аймақта есірткінің таралуына жол бермей, есірткінің заңсыз айналымымен айналысатын қылмыстық топтарды анықтап, олардың әрекеттерін жоюда жоғары кәсібилік көрсетті.

ШҚО ПД Күршім ауданы полиция бөлімінің учаскелік полиция инспекторы, полиция майоры Руслан Керебаев қарда қалып қойған ветеринар дәрігерді құтқарудағы ерлігі үшін марапатталды. Сол күні кешке полицияға «Көрші ауылға кеткен досым төрт сағаттан бері байланысқа шықпай жатыр» деген хабарлама түскен. Аймақта қарлы боран соғып, қалың қар жауып тұрған кез болатын. Учаскелік инспектор Керебаев шұғыл түрде іздеуге шығып, қар үйіндісінде қалжырап қалған азаматты тауып, оны ауылға аман-есен жеткізді.

Полиция департаментінде өткен ерлік сабағында әріптестер марапатталған қызметкерлердің жетістіктерін атап өтіп, өз жұмысындағы кәсібилік пен батылдықтың маңыздылығына тоқталды. ШҚО ПД бастығының орынбасары, полиция полковнигі Серік Манапов жас әріптестеріне қоғамдық қауіпсіздікті қамтамасыз ету қызметінде өзін-өзі дамытуға және елге қызмет етудегі борышын абыроймен атқаруға шақырып, осындай мысалдардың жас буынға патриоттық тәрбие беруде маңызды екенін атап өтті. Ол жас қызметкерлерге еңбектерінде жеміс пен табыс тіледі.

Жанаргүл Мұқатай