Мәжіліс депутаттары Маралды халқымен кездесті
Парламент Мәжілісінің депутаттары Мақсат Толықбаев пен Ринат Зайытов Күршім ауданы, Маралды ауылының халқымен кездесті. Ашық диалог түрінде өткен кездесуде алтын өндіру фабрикасына қатысты мәселелер айтылды.
Жергілікті жұртшылықты мазалаған басты сұрақ – цианид. Ауыл тұрғындарының кейбірі кен өндіру технологиясында цианид қоспасын қолдануға қарсы екендіктерін жеткізді. Химиялық сұйықтық қоршаған ортаға, адам өміріне қауіпті деп есептейді олар, деп хабарлайды Altainews.kz тілшісі.
Халық қалаулылары тұрғындарды алаңдатқан цианид қоспасын фабрика жұмысында қолданудың қоршаған ортаға зияны бар-жоғын анықтау үшін комиссия құру қажеттігін жеткізді.
Сонымен қатар тұрғындар биылғы 8 мамырда алтын фабрикасы салынып жатқан жерге басып кіріп, адамды жарақаттап, компанияның мүлкіне залал келтірді деген айыппен қамауға алынған азаматтарды босатуды сұрады. Бұл заң органдарының құзырындағы іс, сондықтан бәрі заң аясында шешілетіні түсіндірілді.
Көпшіліктің фабрика құрылысын уақытша тоқтата тұру жөніндегі талабына қатысты да түсініктеме берілді. Облыс әкімінің бірінші орынбасары кәсіпорын құрылысын тоқтатуға заңды негіз болуы керектігін және ол тек сот арқылы жүзеге асырылатынын түсіндірді.
Маралдының мәдениет үйінде өткен жиыннан кейін Мәжіліс депутаттары ауыл тұрғындарымен бірге кен өндіру орнын барып көрді.
Мәдениет үйіндегі және кеніш басындағы сындарлы әңгімеден кейін ауыл тұрғындары Астандан ат терлетіп келген депутаттарға алғыс айтып, ризашылықтарын білдірді.
Сонымен қатар, облыс басшылығы тарапынан ауыл ішіндегі көше жолдарына асфальт төсеу, ауызсу тарту, әлеуметтік нысандарды жөндеу, мектептің материалдық базасын нығайту, маралдылық аналарды қалаға әкеліп медициналық тексеруден өткізу сияқты көрсетіліп жатқан қолдау-көмекке бек риза екендіктерін жеткізді. Алдағы уақытта Маралдыда жазда шағын футбол, қыста хоккей мұз айдыны болатын әмбебап спорт нысаны салынып, 1,6 шақырымға жарық тартылып және басқа да жұмыстар жүзеге асырылатынын айта кету керек.