ШҚО-да үздік металлургтерге мемлекеттік награда табысталды
Мемлекет басшысы Қасым-Жомарт Тоқаевтың атынан озат металлургтерге мемлекеттік наградалар табыс етілді. Құрметті марапатты Шығыс Қазақстан облысына жұмыс сапарымен келген Премьер-Министр Олжас Бектенов тапсырды, деп хабарлайды Altainews.kz тілшісі.
Шілденің үшінші жексенбісінде атап өтілетін Металлургтер күні қарсаңында ерен еңбегімен саланың тұрақты дамуына орасан зор үлес қосып жүрген қарапайым еңбек адамдары марапатталды.
Бүгін тау-кен-металлургиялық кешенінде 195 мың адам жұмыс істейді. Бұл –еліміздегі бүкіл өнеркәсіп саласы жұмысшыларының шамамен үштен бірі.
Ауыр, батылдық пен жанкештілікке толы металлург мамандығы қай кезде де жоғары құрметке лайық саналды. Бүгін мен металлургияға қатысы бар барша адамға сапалы жұмысы, кәсібилігі мен жоғары шеберлігі, қызметіне деген адалдығы мен құрметі үшін алғыс айтамыз, – деді Премьер-Министр.
Шығыс Қазақстан облысы әкімінің орынбасары Дархан Сапановтың мәлімдеуінше, облыстың жалпы өңірлік өнімінің құрылымында биылғы бірінші тоқсанда өнеркәсіп үлесі 42%-ға жеткен. Бұл тұрғыда өндірістің жалпы көлемінің басым үлесі өңдеу өнеркәсібіне тиесілі — жалпы 1 трлн теңгеге өнім өндірілген. Металлургия саласының үлесі бүгінде 62% мөлшерінде.
Олжас Бектенов Шығыстың кәсіпорындары еліміздің түсті металлургиясының флагманы болып саналатынын айтып, өндірістік сектордың алдында тұрған міндеттерді атап өтті.
Жұмыс сапары аясында О.Бектенов еліміздегі іргелі кәсіпорындардың бірі – «Қазцинк» ЖШС-да болып, зауыттың өндірістік қуатымен танысты. Сонымен қоса Металлургтер күні мерекесіне орай кәсіпорын қызметкерлерін құттықтады. Ел Президенті Қасым-Жомарт Тоқаевтың атынан үздіктерге мемлекеттік наградалар табыстады. Атап айтсақ, «Құрмет» ордені «Қазцинк» бас директоры Жанат Жанботинге, III дәрежелі «Еңбек даңқы» ордені шебер Алексей Мордовинге, слесарь-жөндеуші Михаил Мещеряковқа, «Ерен еңбегі үшін» медалі катодшы Айдарбек Жақыповқа, құю өндірісінің басшысы Мерғалым Нағышпаевқа және цех басшысы Есбол Сейтқазинге табыс етілді, сондай-ақ басқа да бірқатар металлург алғыс хаттармен марапатталды.
Естеріңізге сала кетейік, «Казцинк» компаниясы мыс, бағалы металдар мен қорғасынның ілеспе өндірісінің үлкен үлесімен мырыш шығарады, сондай-ақ Қазақстандағы ең ірі алтын өндіруші саналады. Бүгінгі таңда тау-кен металлургия кәсіпорнының зауыттары еліміздің алты аймағында орналасқан. Табиғатты сақтау технологияларын белсенді түрде енгізудің арқасында 90-шы жылдардан бастап зиянды қалдықтар көлемі 69,4 мың тоннадан 2023 жылы 15,9 мың тоннаға дейін қысқарды. Сонымен қатар компания жыл сайын әлеуметтік міндеттемелерді орындауға шамамен 12 млрд теңге бөледі.
Фото: primeminister.kz
