Қоғамда қызу талқыланып, үлкен пікірталас тудырып жатқан елімізде атом электр стансасын салу мәселесіне қатысты жалпыұлттық референдум биылғы 6 қазанда өтеді. Мұны Мемлекет басшысы Қазақстан халқына жолдауында мәлімдеп, тиісті Жарлыққа қол қойды.

Д. Серікбаев атындағы ШҚТУ дың сәулет құрылыс және энергетика мектебінің деканы, PhD докторы, Қазақстан Республикасының құрметті энергетигі Айбек Ақаев АЭС салу мәселесіне қатысты өз пікірін білдірді, деп хабарлайды Altainews kz тілшісі.

Айбек Мұратбекұлының айтуынша, Қазақстанда атом электр стансасын салу мәселесі бір жылдан бері қозғалып, біздің қоғамда көптеген пікірталас тудыруда. ШҚТУ ұжымында да осы тақырып төңірегінде қоғамдық тыңдаулар, семинарлар, талқылаулар өткізіліп келеді.

Талқылау энергетикалық тәуелсіздік, АЭС жұмысының қауіпсіздігі, экологиялық қауіпсіздік, экономикалық тиімділік, саяси негізділік, кадрлармен қамту және т.б. факторлардың төңірегінде өрбіп жатыр.

Айбек Ақаевтың ойынша, бейбіт атом энергетикасының әлеуетін пайдалану біздің елімізде ұлттық экономиканың жаңа жоғары технологиялық секторын құруға мүмкіндік береді. АЭС-жасыл энергетика. АЭС салу  еліміздегі энергия тапшылығын жойып, Қазақстанның энергетикалық тәуелсіздігін қамтамасыз ету екенін түсіну маңызды. Қазақстан азаматтары тарапынан «АЭС ке тірелмей, энергиямен қамтудың  басқа жолдары неге қарастырылмайды?» деген  пікірлер айтылуда. Қазақстанда бұл бағытта жүзеге асырылып жатқан жобалар  көп.  Жасыл энергетиканы дамыту үшін, энергия тапшылығын азайту үшін қазіргі күні біздің елімізде жаңартылған баламалы энергия көздері нысандары   көптеп  салынып жатыр. Былтырғы жылдың есебі бойынша Қазақстанда 144 осындай нысан: 45 күн электр станциясы, 57 жел электр станциясы, 39 су электр станциясы, 3 биоотын бөлу нысаны салынған. Сонымен қатар, алдағы жылдары  елімізде бірнеше жылу электр орталықтары салынады. Соның біреуі біздің Өскеменде салынады. Осы сияқты генерация алатын барлық энергия көздерінің мүмкіндіктері жан -жақты қарастырып жатырмыз.

Білікті мамандар мәселесіне қайтып оралатын болсақ, сарапшы маман елімізде  АЭС қызметін бастапқы жылдары қажетті мамандармен қамтамасыз етуге мүмкіндігіміз бар екендігін де айтты. Алматыдағы ядролық физика институтында реактор жұмыс істеп тұр. Ол ғылыми зерттеу жұмыстарында, медицина саласында пайдаланылып жатыр. Ал, өзіміздің облысқа көршілес Абай облысындағы Курчатов қаласында Ұлттық ядролық орталық жұмыс істеп жатыр. Онда екі реактор жұмыс істеп тұр. ШҚТУ ды бітірген түлектердің біразы сонда жұмыс істеп жатыр. Осы нысандардағы мамандарды АЭС жұмысына бейімдесе, дайын кадрлар.