Мемлекет әлеуметтік жағынан осал отбасылардағы 500 мыңнан астам балаға қолдау көрсетті. Биылғы жылы жалпыға бірдей білім беру қорынан ата-аналардың есепшоттарына 22,2 млрд теңгеден астам қаражат аударылды, деп хабарлайды Altainews.kz тілшісі.

ҚР Оқу-ағарту министрлігінің баспасөз қызметінің мәліметінше, қолдау атаулы әлеуметтік көмек алатын, табысы ең төменгі күнкөріс деңгейінен төмен отбасылардағы оқушыларға, жетім және ата-анасының қамқорлығынсыз қалған балаларға, сондай-ақ төтенше жағдайлар салдарынан шұғыл көмекке мұқтаж отбасылардағы мектеп оқушыларына көрсетілді.

Жергілікті атқарушы органдардың ақпараты бойынша, өтініш бергендердің 100 пайызы мемлекеттен қаржылай көмек алған.

Сондай-ақ, Оқу-ағарту министрлігінің бастамасымен жыл сайын өткізілетін «Мектепке жол» республикалық қайырымдылық акциясы аясында ондаған мың отбасы демеушілердің көмегіне ие болды.