Белоусовка кентінің Юбилейный көшесінде орналасқан №7 көппәтерлі тұрғын үйдің мәселесі шешімін табатын болады. Бұл туралы аталмыш үйдің тұрғындарымен кездескен Глубокое ауданының әкімі Эльдар Тумашинов айтты, деп хабарлайды Altainews.kz тілшісі.

Оның айтуынша, қазір мәселе облыс әкімінің бірінші орынбасары Нұрымбет Сақтағановтың тікелей бақылауында.

Белгілі болғандай, 2007 жылы жүргізілген алғашқы сараптама нәтижесінде үйдің екі, дәлірек айтсақ үшінші және төртінші подъезіндегі пәтерлер тұруға жарамсыз деп танылған. Артынша 34 пәтердің тұрғындары көрші тұрғын үйге көшірілген. Қалған екі подъездің тұрғындарына ешқандай қауіп төнбеген соң, олар өз баспаналарында қала берген.

Алайда, ұзақ уақыт бойы үйдің қалған бөлігінің тұрғындары әкімдікке ресми шағым түсірмегендіктен, жағдай біраз ушығып кеткен сыңайлы.

Аудан басшысының айтуынша, Юбйлейный, 7 мекенжайындағы үйді толықтай тұруға жарамсыз деп тану туралы түпкілікті шешім қабылдау үшін тағы бір техникалық сараптама қажет.

Эльдар Тумашинов жақын арада жүргізілуге тиіс жаңа сараптама аяқталғаннан кейін үйдің мәселесі міндетті түрде шешімін табатынына уәде берді. Аудан басшылығы тұрғындарды басқа үйлерге көшіруге, сондай-ақ олардың мүлкін сатып алуға дайын. Сонымен қатар, әкімдік адамдарға қолжетімді ипотекалық бағдарламалар арқылы жаңа тұрғын үй сатып алуға көмектесуге әзір.