2024 жылдың 2 қыркүйегінде ел Президенті Қасым-Жомарт Кемелұлы Тоқаев Қазақстан халқына арнаған Жолдауында еліміздің әлеуметтік-экономикалық дамуы мен құқықтық жүйесін жақсартуға бағытталған ауқымды шаралар туралы айтты. Жолдаудың басты мақсаты – халықтың әл-ауқатын арттыру, экономиканы жаңғырту және қоғамда әділеттілік қағидаларын жүзеге асыру. Бұл реформалар еліміздің барлық аймақтарында жаңа өзгерістерді алып келіп, тұрғындардың өмір сапасын арттыруды көздейді.

Президент Жолдауында айтылғандай, соңғы жылдары Шығыс Қазақстанда көптеген реформалар жүзеге асырылды. Әсіресе, Тарбағатай және Самар аудандарының тұрғындары үш жыл бұрын жаңадан құрылған әкімшілік-аумақтық бірліктердің оң нәтижелерін көріп отыр. Сонымен қатар, жақында шекара маңындағы Катонқарағай мен Марқакөл аудандарының тұрғындары да осы реформалардың пайдасын сезініп, елде болып жатқан өзгерістерге куә болды, деп хабарлайды Altainews.kz тілшісі.

Президент атап өткен тағы бір маңызды жоба – бұл Катонқарағай ауылы мен Зайсан қаласында әуежай салу мәселесі. Бұл бастама өңірдің шекаралық және шалғай аудандарын дамыту мақсатында қабылданған мемлекеттік жоспарға енгізіліп, оған қолдау көрсетіліп отыр. Әуе қатынасының дамуы арқылы бұл өңірлердің инфрақұрылымын жақсартуға, халықтың әлеуметтік жағдайын көтеруге мүмкіндік тумақ. Сонымен қатар, тұрғындар өз көкейіндегі сұрақтардың шешімін тауып, «Халық үніне құлақ асатын мемлекет» тұжырымдамасының нақты іске асырылып жатқанын көріп отыр.

Президенттің алға қойған міндеттері бойынша Үкімет пен әкімдер экономиканың құрылымын өзгертуге баса назар аударуы тиіс. Бұл міндеттер тек қана экономикалық өсуге емес, еліміздің тұрақты дамуына мүмкіндік беретін жаңа тетіктерді қарастыруды көздейді. Жаңа жобалар мен инвестициялар арқылы еліміздің түрлі салаларын өркендету маңызды болып табылады.

Бірақ, Шығыс Қазақстан облысы республикалық бюджеттің доноры болып табылмайды және республикалық трансферттерге 64% тәуелді. Облыстың өз кірістерінің үлесі тек 36,3% құрайды. Бұл мәселе өңірдің экономикалық жағдайын тұрақтандыруды талап етеді. Сол себепті облыс әкімдігі жергілікті бюджетке түсімдерді арттыруға бағытталған жұмыстарды күшейтуді жоспарлап отыр. Мысалы, соңғы 11 айда облыс бюджетіндегі жеке табыс үлесі 35,1%-дан 36,3%-ға дейін өсті. Бұл көрсеткіш облыстың экономикалық тұрақтылығын арттырып, өзін-өзі қамтамасыз ету деңгейін көтеруге мүмкіндік береді.

Президент өзінің Жолдауында 2029 жылы экономикалық өсімді екі есе ұлғайту міндетін қойған болатын. Бұл тапсырманы орындау үшін барлық қалалар мен аудандар экономикалық өсу нүктелерін айқындап, қолда бар даму әлеуетін тиімді пайдалануға тиіс. Жаңа серпінді жобаларды ескере отырып, нақты сектордағы, туризмдегі және басқа да салалардағы өсу бағыттары анықталатын болады. Шығыс Қазақстан облысында бұл бағытта маңызды қадамдар жасалуда. Облыс әкімдігі мен жергілікті басқармалар кәсіпкерлік белсенділікті арттыру, жаңа инвестициялар тарту мақсатында бірқатар жобаларды қолға алған.

Кәсіпкерлік белсенділік – бұл халықтың өнімді және жоғары табысты жұмыспен қамтылуының кепілі болып табылады. Осыған орай, кәсіпкерлік ортаны дамыту, жаңа жұмыс орындарын ашу және өндіріс көлемін арттыру мақсатында жергілікті әкімдіктер мен кәсіпкерлер бірлесіп жұмыс істеуде. Бұл шаралар халықтың табыс деңгейін арттырып, экономиканың тұрақты дамуына ықпал ететін болады.

Қасым-Жомарт Тоқаевтың Жолдауында айтылған реформалар мен экономикалық өсімнің жаңа бағыттары еліміздің тұрақты дамуына негіз болары сөзсіз. Мемлекет басшысы алға қойған міндеттерді орындау үшін барлық мемлекеттік құрылымдар мен жергілікті әкімдіктер бірлесе жұмыс істеуі тиіс. Шығыс Қазақстан облысы сияқты өңірлерде экономикалық өсімді ынталандыру, әлеуметтік жағдайды жақсарту және халықтың әл-ауқатын арттыру үшін ауқымды шаралар қолға алынуда.

Бұл бағытта Президенттің «Халық үніне құлақ асатын мемлекет» тұжырымдамасы маңызды рөл атқарып, елдің барлық аймақтарында іске асырылып жатқаны байқалады. Облыс экономикасын диверсификациялау, жаңа инвестициялар тарту, шағын және орта бизнесті қолдау арқылы өңірдің қарқынды дамуына мүмкіндік тудыру – бұл тек экономиканы жақсарту ғана емес, сонымен қатар қоғамның жалпы тұрақтылығын нығайтуға ықпал етеді.

Еліміздегі барлық реформалар мен шаралар халықтың өмір сапасын жақсартуға бағытталуы керек, ал бұл үшін әрбір азаматтың белсенді қатысуы қажет. Ортақ мақсат үшін бірге жұмыс істеп, Қазақстанның жарқын болашағына үлес қосу – біздің барлығымыздың басты міндетіміз.

 Ержан Әбіш